GÓÐ OG EINSTÖK ÚRLAUSN, SEM BER AÐ ÞAKKA

Forsaga málsins er sú að fyrir nokkrum árum keypti ég bók Magnúsar Þórs Hafsteinssonar "Dauðinn í Dumbshafi" og jólin á eftir fékk ég bókina "Návígi á Norðurslóðum" í jólagjöf.  Báðar þessar bækur, eru  að mínu mati mjög góðar, vel skrifaðar og stíllinn þannig að þær halda manni alveg til síðustu blaðsíðu.  Svo gerði ég það, sem maður á aldrei að gera, ég lánaði þessar bækur og að sjálfsögðu fékk ég þær aldrei til baka.  Þannig að núna seinni árin hef ég alltaf haft augun hjá mér og þegar ég fer í bókabúðir leita ég alltaf eftir þessum bókum, en alltaf án árangurs.  Um síðustu helgi ákvað ég að fara í þetta á fullu ég hafði samband við Magnús Þór Hafsteinsson.  Hann átti ekki til eintök til að hjálpa mér en benti mér á útgefandann (Bókaútgáfan Hólar), en áður hafði ég verið í sambandi við Forlagið en af einhverjum orsökum hélt ég að þeir hefðu gefið bækurnar út.  Ég sendi tölvupóst til útgefandans, þar var mér tjáð að "Dauðinn í Dumbshafi" væri ekki til en "Návígi á Norðurslóðum" væri til og svo nýjasta bókin eftir Magnús Þór Hafsteinsson "Tarfurinn frá Skalpaflóa".  Ég bað um að þessar tvær bækur yrðu sendar til mín í póstkröfu.  Ég fékk tölvupóst til baka þar sem ég var beðinn að leggja "smáaura" inn á ákveðinn reikning og staðfesta bara þegar ég væri búinn að því.  Ég gerði þetta að sjálfsögðu og hugsaði með mér að ég fengi svo póstkröfu eftir nokkra daga.  En viti menn, þegar ég var að horfa á fréttirnar á stöð2 í gærkvöldi, var bankað hjá mér og þar var starfsmaður póstsins með pakka til mín.  Þessi pakki innihélt báðar þessar bækur og þar var enginn reikningur.  Þarna sendi bókaútgáfan mér þessar bækur nánast gefins.  Mér verður sjaldnast orða vant en þarna skeði það.  Þetta atvik verður til þess að í framtíðinni legg ég á það áherslu að kaupa bækur frá bókaútgáfunni Hólum og svo að sjálfsögðu er Magnús Þór Hafsteinsson í sérstöku uppáhaldi hjá mér sem höfundur.  Vonandi getur einhver hjálpað mér með að nálgast bókina "Dauðinn í Dumbshafi".

Athugasemdir

[Jónas Ómar Snorrason, 10.6.2015 kl. 19:42]

Þatta var góð frásögn Jóhann.

[Jóhann Elíasson, 10.6.2015 kl. 19:46]

Þakka þér fyrir.  Það er allt of lítið um svona lagað og þegar vel er gert er um að gera að láta vita af því....

[Helga Kristjánsdóttir, 10.6.2015 kl. 23:24]

    Gamla ísland dúkkar upp, Græðgin á undanhaldi. Verulega fallegt.

[Jóhann Elíasson, 11.6.2015 kl. 08:45]

Já Helga, ég var verulega ánægður með þessi viðskipti og forsvarsmaður Bókaútgáfunnar Hóla, Guðjón Ingi Eiríksson, á heiður og lof skilið fyrir framgöngu sína í þessu máli.