Full ástæða til að FLAGGA Í HÁLFA STÖNG.

Dagurinn er bjartur og fagur og lofar góðu en því miður byrjar einnig í dag nýtt fiskveiðiár.  Að sjálfsögðu ættu menn að vera yfir sig ánægðir með það, sérstaklega þeir sem ekki hafa getað róið til fiskjar undanfarna daga vegna kvótaleysis, en þetta fiskveiðiár, sem nú er að hefjast, verður að öllum líkindum endurtekning á síðasta fiskveiðiári, nema það verður að öllum líkindum verra ef eitthvað er.  Aflamark á þorski dróst saman um 33% síðasta fiskveiðiár og verður óbreytt á þessu ári.  Verð á leigukvóta hefur HÆKKAÐ upp úr öllu valdi en á sama tíma hefur verð á varanlegum aflaheimildum LÆKKAÐ.  Hvernig í ósköpunum má þetta vera?  Fyrst skulum við skoða leigukvótann, það segir sig alveg sjálft að rekstrarlega séð er MUN hagkvæmara að leigja kvótann út en að veiða hann sjálfur og ég tala nú ekki um þegar verðið er komið í 260 krónur fyrir kílóið.  En hvernig er þá eiginlega hægt að RÉTTLÆTA VERÐá aðföngum (því kvótinn er ekkert annað en hráefni) sem er nálægt því verði sem fæst fyrir aflann á fiskmörkuðum?  Svarið er náttúrulega einfalt:  ÞAÐ ER EKKI HÆGT.  En þeir sem kaupa á þessu verði gera þetta í þeim gamla góða anda að á meðan þeir rói séu þeir að draga björg í bú.   Kvótaeigandinn hagnast og það mikið, þjóðfélagið hagnasttil skamms tíma, því þessi vitleysa eykur þjóðartekjurnar en til lengri tíma litið TAPAR þjóðfélagið á þessu því kaupandinn endar með því að fara á hausinn og þá lækka þjóðartekjurnar og þeim fjölgar sem þurfa félagslega aðstoð.  Þá skulum við snúa okkur að Varanlegu aflaheimildunum; Samkvæmt öllum markaðslögmálum ættu þær að hafa HÆKKAÐ og það nokkuð mikið en þess í stað hafa þær LÆKKAÐ, ekki er ég nú alveg með töluna en eftir mínum heimildum er um að ræða 35-55%, þetta er nú ekkert smáræði en hver skyldi ástæðan vera?  Ástæðurnar eru sennilega margar, en að mínu mati er STÆRSTA ástæðan sú að aðilar markaðarins eru búnir að missa alla trú á kvótakerfinu, sem oft hefur verið talað um sem "besta fiskveiðistjórnunarkerfi í heimi" og flestir eru á því að það eigi að "kasta" því fyrst og fremst ætti að taka til hjá HAFRÓ, því það hefur sýnt sig að "rannsóknaraðferðir"  stofnunarinnar eru eitthvað sem leikskólakrakkar myndu aldrei láta sjá til sín hvað þá fullorðið fólk sem telur sig hátt yfir aðra hafið (þar liggur kannski vandinn) það virðist vera að yfirmenn HAFRÓ séu gjörsamlega veruleikafirrtir.  Á meðan menn HAFRÓ finna engan þorsk, þá eru sjómenn á stöðugum flótta, því það má hvergi dýfa niður veiðarfæri án þess að þar sé þorskur og hann er orðinn svo tæpur með æti að hann er farinn að éta undan sér fyrir mörgum árum síðan.

Hversu lengi ætla stjórnvöld að sofa á verðinum, ég hélt í fávisku minni, að stjórnvöld ættu að gæta hagsmuna ALLRAR þjóðarinnar ekki bara einhvers þröngs hagsmunahóps?  Kvótakerfinu hefur tekist að brjóta markaðslögmálin og það sem meira er, Mannréttindanefnd Sameinuðu Þjóðanna hefur úrskurðað að kvótakerfið brjóti mannréttindi, en samt er ekkert gert.  Hvað þarf eiginlega til?   Í tilefni dagsins hvet ég alla til að FLAGGA Í HÁLFA STÖNG, því þetta er sorgardagur í sögu lands og þjóðar og einnig hvet ég til að 1 september ár hvert verði þetta gert þar til kvótakerið hefur verið tekið af.

Nýtt fiskveiðiár mörgum erfitt